Монгол улсын "Алдарт уяач" Мижидийн Галбадрах нь 1946 онд Алаг-Эрдэнэ сумын нутаг "Улаан хавцгайт" гэдэг газар Мижидийн 5 дахь хүү болон мэндэлсэн. Бага насаа эцэг эхийн гар дээр өнгөрүүлж 1954 онд бага сургуульд орж 1958 онд 4дүгээр анги төгсөн аав ээжийн хамт мал маллаж байсан. 1971 онд эхнэр Сүрэнгийн Должинтой гэр бүл болж 5 хүүхэд төрүүлж өсгөсөн. М. Галбадрах нь аймаг сумын аварга малчин, тарга хүчний хошой аварга, залуу уяачдыг мал маллах арга ухаанд сургаж адуугаа Галширын удам угшил, Тэсийн голын адууны угшилаар сэлбэж чанаржуулж байсан. Уясан морьд нь тогтмол айрагдаж уясан эзнээ болон наадамчин олноо баясгаж сумынхаа нэрийг аймаг даяар гаргаж явсан ахмад уяач юм. Галбадрах нь 1980 онд Сумын алдарт уяач, 1991 онд Аймгийн алдарт уяач, 1995 онд Улсын алдарт уяач цол хүртсэн ба 2012 онд Төрийн дээд шагнал " Алтан гадас" одонгоор шагнагдаж байсан. Нийт 153 түрүү, 111 айраг авч хосгүй амжилт гаргаж байсан.